湖南湖北~1

2008年2月8日

第一回

晨光未現, 烏燈黑火, 已動身出發, 帶著愉快緊張心情開始工作, 抵達機場嘆過早餐, 順順利利結集隨員, (隨員者~付費給我去旅遊的人), 大小九隻登機, 飛住湖北武漢天河機場, 今團由湖北玩至湖南, 再折返湖北回程. 從香港飛往武漢, 花不足兩小時. 中午一時三十分到步, 取好行裝, 小解. 才到入境處尋找導遊, 武漢全陪導遊及司機, 年青人一個, 尚算和藹可親, 禮貌賓賓. 因言談看年紀, 以為我是經驗豐富老手. 一切就緒, 坐穩出發, 沿途出發. 頭手咪開場白介紹導遊, 表現無瑕, 自也滿意, 何況同業, 隨員眼中, 多出一份尊重. 領隊行業, 頭首咪最為要, 整個旅程關鍵時刻, 開始做好, 加日後殷勤服務, 照顧八方, 打賞會多得多.

武漢我去過兩次, 第一次係三四十年前同情人愛人去華東七日之旅, 第二次都相隔咗十幾廿年, 係去出差兩日一夜快閃, 去傾啲正宗狗嗡無俚結果嘅生意. 武漢只記得一度地方, 就係黃鶴樓. 因為首詩好Q正嘅關係. 入到市區, 先到湖北博物館. 第一站, 車程用咗大約一個鐘時間由機場, 嚟到市中心嘅湖北博物館嘞！

 

我都係第一次嚟, 梗興奮啦! 原來仲發現, 湖北博物館係免費入館, 據悉國內所有文化設施免費, 真為人民服務, 推廣國民教育. 香港特別無能行政區, 何時跟得上國家政策, 同步看齊, 有著同一地方, 不同的天空. 只要排隊攞門票就得, 旅行團咪攞團體票.

嚟到仲見前幾啲雪災留低嘅痕跡, 睇落都幾勁, 家陣仲未清哂啲雪， 嗰幾日真係好玩到， 出哂新聞紙添. 家陣天氣溫度好和暖, 三四度左右好舒服.

入到嚟首先導遊就去再買票, 因為屈到成班富貴, 要俾入場費除外, 仲去睇秦樂表演, 位位斬多咗最少五十皮人仔. 頭威頭勢, 有個好開始.

 

而我呢, 既然有免費嘢, 又從未睇過, 梗入去捧場啦!

睇完感覺, 值, 值回票價. 真佩服中國樂師, 可以用咁嘅東東, 演奏出清脆奇特, 外國人根本無得模仿嘅樂器, 奏出古典音律, 近代歌曲.

好嘞, 睇完秦樂表演(表演係用仿製品演出), 就入到去博物館裡頭, 急不及待馬上去睇睇啲真品古董先. 勁勁勁!

睇睇兩千幾年前嘅地震儀, 齋睇手工已經嚇死人, 仲要係唔洗通電, 唔洗駁電腦添!

俚把兵器就利害囉! 名為天下第一劍(越王勾踐劍). 聞說, 到家陣咁科學昌明, 都仲未研究到把劍用乜金屬嚟做, 你咪話唔神奇. 劍紋複雜精緻, 劍鋒鋒利無比, 隔住玻璃都可以感受到劍鋒嘅鋒利, 去到睇過你先知.

俚支矛亦唔少嘢, 雖然都有啲氧化, 但睇落十分鋒利.

行行從行行, 我參觀咗大約一個半鐘, 都係好似走馬看花咁, 睇唔哂, 就要去收人. 而班隨員, 好多已經坐哂喺門口, 等開飯.

無法啦, 人家俾錢嚟參觀都唔慢慢去欣賞, 我免費嘅點會出聲吖! 一上車, 十分鐘車程, 就去到餐廳酒家, 今晚會食餐好啲嘅.

睇氣派真係唔錯.

樓底高, 包廂多. 俚啲咪係一分錢一分貨囉!

而我哋三條食霸王餐嘅, 上嚟嘅飯菜亦唔錯, 起碼都有半隻燒雞脾, 食完餐豐富嘅晚餐, 應該係休息時候. 可惜尚未, 我們要披星戴月, 跑到三百里之外, 坐落宜昌的酒店, 花近四小時車程, 沿途黑夜飛馳, 在月掛天空之時, 到達酒店. 速速分配房間, 派送溫馨提示, 早餐, 集合時間, 各人鳥獸散. 我也回房間休息. 想著杜甫的一首名詩, [客至].

舍南舍北皆春水, 但見群鷗日日來. 花徑不曾緣客掃, 蓬門今始為君開. 盤飧市遠無兼味, 樽酒家貧只舊醅. 肯與鄰翁相對飲, 隔籬呼取盡餘杯.

第一晚在兩湖之地, 憶當年, 忍耐忍耐!